السلام عليكم
صراحة انا مهتم جدا بمجال الامن سيبراني من زمن و بدأت اتعلم من المنتدي هنا و حابب ان ده يكون مستقبلي بس في مشكلة...
حاليا انا طالب ثانوي عام و خايف اني اجيب درجة مش ولا بد و مقدرش ادخل جامعة حاسبات و معلومات و اللي من مصر هيفهم ده كويس.
السؤال اللي عندي هل في بدائل لحاسبات و معلومات و لو جبت درجة مش كويسة ازاي اكون مكمل في نفس المسار بتاعي و هل السفر كدراسة في الخارح هيكون سهل ولا صعب؟
و شكرا مقدما
أنا شايف إنك عندك عدة أسئلة، بعضها انتا قدرت توضحو وبعضها الاخر انتا مذكرتهوش لكن هحاول استنتج الأسئلة كلها سواء اللي ذكرته او اللي مذكرتهوش
ممكن نلخص سؤالك في كذا نقطة كالاتي : -
1 - عاوز تدرس سايبر لكن انتا في ثانوي عام وخايف تتعطل عن المذاكرة.
2 - خايف متجيبش درجة تدخلك حاسبات.
3 - هل في بديل لحاسبات ؟
4 - هل في إمكانية للدراسة بالخارج ولا هيكون صعب ؟
أولا: تقدر تدرس سايبر جنب الثانوية ودا بشوفو الأفضل ليك جدا ولكن بشكل مقنن جدا لأن الثانوية عندنا في مصر عاملة زي المعسكر بمعنى اخر، دراسة السايبر هتكون في وقت الفراغ بتاعك، ممكن تحددلها ساعة في الأسبوع أو تلت ساعة كل يوم والدنيا هتبقى تمام إن شاء الله، ولكن لو انتا بتروح دروس في كل المواد منصحكش تحط السايبر في الخريطة خالص( بصراحة مش مقتنع بموضوع الدروس دا خالص)
ثانيا: هنفترض في أسوأ الأحوال إنك مقدرتش تجيب درجة تدخل لك كلية، في بدايل طبعا واللي هيا أي كلية تقنية حتى لو تربية حاسب الي.
طيب لنفترض ان مفيش اي كلية تقنية تنفع ؟؟ أي كلية تانية هتخشها عادي جدا أهم حاجة يكون معاك بكالوريوس لأن دايما الشركات بتطلب بكالوريوس، صحيح إنهم أفي أحيان كتير بيطلبو بكالوريوس تقني لكن أعرف شخصيا ناس كتير جدا كبار في المجال ومعاهم كليات زي خدمة اجتماعية واداب وحقوق وتجارة واعلام لكن هتحتاج تشتغل على نفسك جامد.
ثالثا الدراسة في الخارج خيار جيد لو هتكون منحة ممولة بالكامل ودي صعب تلاقيها اذا كانت درجاتك مش عالية، وحط في بالك ان الدراسة برا غالية اوي
دراسة سنة مثلا في كلية حاسبات في امريكا هتكلفك على الاقل 48 الف دولار في السنة، الدراسة برا مش رخيصة ابدا، وفي كليات تانية اوروبية اونلاين ممتازة جدا ممكن تاخد منهها بكالوريوس سايبر سيكيوريتي لكن بتدفع بالشهر واقل حاجة 170 دولار شهريا لمدة 4 سنين ودا طبعا صعب جدا
نصيحتي : ادرس كويس في الثانوية خش الكلية اللي مجموعك هيجيبها، لو جبت حاسبات كان بها، يبقى تجتهد في الكلية وتدرس سايبر في نفس الوقت، أما لو مجبتش حاسبات فمش مشكلة، خش اي كلية لكن متذاكرلهاش اوي يعني يادوب تنجح، واغلب وقتك تخليه للأمن السيبراني وهتلاقينا هنا كلنا في خدمتك وهنساعدك باللي نقدر عليه بإذن الله
الله يوفقك ويعينك ولو اختجت مزيد من النصايح بخصوص 3 ثانوي متترددش في السؤال أبدا
