السلام عليكم , أسعد الله مساكم بكل خير , في البداية أتوجه بكامل الشكر والتقدير للمهندس محمد الخوالدة على العمل الرائع الذي قام به لتعليم مجال cybersecurity مجانا و ربنا يكتبلك الخير وينفعك بهذا العمل في دنيتك وفي أخرتك ان شاء الله ,
انا ماشي حاليا في دورة Cybersecurity V1 ولكن توقفت عند فيديو رقم 43 ألا وهو CORS SOP (SAME ORIGIN POLICY) وبعد ذلك ما رضيت أكمل وصارلي أسبوعين تقريبا موقف والسبب في ذلك شفت الفيديوهات الي بعد ذلك وقلت لازم أدرس html و javascript و sql عشان أقدر أكمل بعدها قلت لا ليش أضيع أكثر من 4 شهور وانا أتعلمهم علما انا خلصت java قبل كدا كاملة بعدها بقول طيب يا رجل في اشي ناقص غير لغات البرمجة لازم أتعلمو ومش عارف ايش هو , يعني حرفيا حاسس حالي وقعت في حفرة ومش عارف أطلع منها او كأني في متاهة و مش عارف كيف أطلع منها ,
السؤال كالتالي / الي بدي اياه هو توجيه ايش أسوي ايش اعمل , أكمل في الدورة حتى لو ما فهمت ولا أروح أتعلم لغات البرمجة هادي وأنظمة التشغيل بالتفصيل و assembly language ومعهم بايثون , طيب هتستهلك وقت كثير وممكن أكون ماشي غلط طيب لو تعلمت هدول وبعدين ايش أسوي ؟
وعشان تساعدوني أكثر في الاجابة انا صراحة بدي أصير مهندس أمن سيبراني مش bug bounty فقط او penetration tester فقط يعني بدي ألم معلومات قدر الامكان بس بطريقة تسلسلية صحيحة بحيث أروح أقدم على أي شركة تقلي فورا أهلا وسهلا ان شاء الله .
أعتذر أطلت عليكم في الكلام لكن انا في حيرة من أمري وقلت ما الي غير رب العالمين أكيد ثم شباب شبكة شل العربية الكرام , ويعطيكم ألف عافية يا رب.
وعليكم السلام ورحمة الله وبركاته، الشكر كله لله والفضل كله لله، مقصرين والله.
شوف خليني اكون معك صريح اول اشي غلط انت عملته هو انك وقفت اسبوعين وخلينا نعتبرهم اسبوعين ( استراحة محارب ) ونتخطاهم.
حياة مهندس أمن المعلومات كل يوم بده يتعلم ممنوع منعاً باتا يوقف بيوم من الايام، تقدر تحكي مثل الأكل والشرب، بتقدر تقعد اسبوعين بدون اكل وشرب ؟
طيب ليش لازم تدرس SQL وJS وHTML و PHP ؟
ببساطة عشان لما تواجهك ثغرة ويب تعرف هي اصلاً كيف تم بناء الكود وليش اصلاً صار في ثغرة وكيف تطبيق الويب يشتغل جوا السيرفر على مستوى الـ BackEnd وكيف بتم التواصل مع ال FronEnd، تمام ؟
طيب في كلمة انت حكيتها وهي
قلت لا ليش أضيع أكثر من 4 شهور وانا أتعلمهم
هون في فكرة شوي انا ضدها وهي تضييع الوقت بالعلم، بدك تتعلم ؟ بدك تصرف وقت.
احنا كلنا انولدنا على الارض لا نفقه شيء من العلم وكلنا بدنا نتعلم ولا تتطلع على الوقت ابداً بس كيف بدك تصير مهندس أمن معلومات واذا انعرض قدامك كود PHP ما بتقدر تعمل عليه Review ؟
يعني على سبيل المثال البسيط جداً جداً مثل eval function داخل ال PHP لو انت لقيته وانت بتعمل Code Review داخل ملف PHP شو هي صلاحياته ؟ شو بيعمل ؟ هل عليه انبوت فلتر ؟
هاي الاسئلة وغعيرها من الاسئلة ما بتجاوب عليهم ك مهندس امن معلومات الا لما تكون متمكن من الManual تبع الفنكشن على سبيل المثال!
PHP is a popular general-purpose scripting language that powers everything from your blog to the most popular websites in the world.
www.php.net
اكون صادق معك انا لما عملت الكورس انا عملته حصراً لطلاب الكلية اللي كنت ادرس فيها وكنت فارض انهم ماخذين اساسيات ما تطرقت لها ببعض المواضع واهمها لغة البرمجة، لكن شاء الله عزوجل ان الكورس ينتشر والحمدلله رب العالمين.
اما بخصوص الاسمبلي فهي موجهه حصراً للي بده يشتغل بمجالات على مستوى Low level language وهذا الموضوع يرجعلك اكيد وانا بأكدلك ان اكتسابك للمعلومات هو مش خسارة وقت ولا خسارة جهد ابداً وبحثّك على اكتساب المعلومات دايماً ( طلب العلم ).
وخلينا الان انا وياك نتفق على كم نقطة:
1- لازم تطلع من حالة ( الحفرة ) اللي انت واقع فيها واوعك ثم اوعك ثم اوعك تشعر نفسك انك ضايع ولو صار هذا الكلام ( مد سجادة الصلاة ) ووجه وجهك للذي فطر السماوات والارض وحاول ارتاح نفسياً شوي وخليك مؤمن بأن اللي مكتوبلك مستحيل يروح لغيرك واللي مش مكتوبلك مستحيل توخذه.
2- اعمل تقييم لعلومك بالشبكات ولينكس والبرمجة وانت ما شاء الله اصلاً دارس جافا وهاذ شيء جداً جداً جميل ولكن بدك تزيد اكثر واكثر.
3- موضوع انك تقدم على اي شركة وتقلك من اولها اهلا وسهلا هاذ طلعلي اياه من راسك لأنك هيك بتتعدى على حدود الخالق لمّا قال ان في السماء رزقكم وما توعدون، يعني ممكن تكون بتفهم عن 10 مهندسين ولكن الله مش كاتبلك رزق بمرحلة معينة بحياتك او بمكان ما، وهاي كلها تدابير الخالق احنا بنسعى وبنطلب العلم وبنحاول نكتسب وبنحاول نقدم أفضل ما عنا والباقي على رب العالمين بدون احباط وبدون سخط وخليك راضي بكل احوالك ويا سلام لما رب العالمين يشوفك راضي بقضاءه وقدره عليك.
4- عشان تصير مهندس امن معلومات بدك تلغي وقت الفراغ والرفاهية من حياتك وخصوصاً انك مستعجل يعني لما تكون شغال على كمبيوترك وبتجتهد وتعبت ؟ يلا وقت راحتك بين الكتب
5- الزم الصدقة والزم الاستغفار والزم الشكر وخليه على لسانك لأن الشكر والاستغفار مفاتيح عجيبة ربّانية لكل عسر بحياتك.
6- حاول ارجع اعمل تقييم لأهدافك يعني عشان تكون مُلّم بكثير من الامور ف بدك علم بكثير من الامور يعني الاسمبلي وغيرها بدك تكون عارف هم لأيش ؟ وبشو بستخدمهم بالمجال ؟
حاول ابحث على الانترنت عن مجالات استخدام لغات البرمجة وحاول تعلم cloud
وانا انشأت شبكة شل العربية بهدف توسيع التعاون ونشر العلم لوجه الله وما يكون الموضوع مقتصر على قناة يوتيوب وبتم التنظيم هون بشكل افضل من اي مكان ثاني بفضل الله.
ختاماً، اليوم العلم كبير ومصادر العلم كبيرة وكثيرة ومتنوعة واسأل الله ان يهديك للصواب بحياتك ولا تجزع ولا تحس نفسك واقع بأي حفرة وطبق النقطة الخامسة بدون كلل او ملل بالاضافة الى انك لا تنسى تعلّم اخوانك المسلمين مما رزقك الله عزوجل.
اعتذر على الإطالة.
دمت بخير.
اخوك ستورم.
