بسم الله الرحمن الرحيم
لو فرضًا كان عيد ميلاد صديقتي وأنا مو قادرة أروح لسبب مُعيَّن , لكن قررت إنه أرسلها هدية وهالهدية جدًا خاصة ومُميزة ورح أرسلها مع شركة توصيل, لكن أنا خايفة شخص يفتح الهدية يشوفها , فقررت إني أروح أحطها بصندوق أعطتني إياه صديقتي واتفقنا أنا وهي إنه نتبادل الأشياء بين بعض بهذا الصندوق.
طبعًا اله مفتاح خاص ، فحطيتها للهدية بالصندوق وقفلت عليها بإحكام وأرسلتها مع الشركة لصديقتي, وهي كمان عندها مفتاح لهذا القفل فبالتالي بضمن لو أي شخص رح يحاول يفتحها بالطريق فهو ما عنده مفتاح الصندوق والمفتاح بس موجود نسخه منه عندي ونسخه أُخرى عندها ولما توصل لصديقتي بتفتحها بالمفتاح وبتشوفها , وكذلك هو دور التشفير فهو بحافظ على خصوصية الرسالة من اطلاع أي شخص غير المعني ، الآن بنفهم كيف وشو علاقته بالمثال اللي ذكرته.
ما معنى الـ Encryption؟
ببساطة الفكرة كمان إني راح آخذ الداتا هاي اللي رح أرسلها وأحولها لكلام غير مفهوم أبدًا ومو واضح أبدًا, يعني يُصبح عبارة عن كلام غير مقروء.
مُمكن الآن يتكون عندكم نوع من اللُبس بينه وبين الهاش, لكن الحقيقة أنه كل واحد منهم مختلف عن الآخر تمامًا ، لأن الفكرة بالتشفير هي وجود "مفتاح", بكون معي مفتاح معين بشفّر فيه الداتا ( من خلال عمليات حسابية بستخدم فيها المفتاح ) وبعطي المفتاح للطرف الآخر حتى يفك تشفير الداتا من خلاله (عمليات حسابية كمان بستخدم فيها المفتاح ، وتخيلوا المفتاح إنه عبارة عن رقم معين حتى توضح الكم الفكرة بشكل أولي ) تمامًا نفس فكرة مفتاح الصندوق اللي تكلمنا عنها بالبداية ، وفيه أيضًا فرق آخر واضح بينه وبين الهاش وهو إنه يمكن عكسه واسترجاع النص الأصلي باستخدام المفتاح, لذلك يعتبر reversible أي قابل للعكس.
الفائدة من الـ Encryption؟
ببساطة تُنقَل رسالتي والداتا الخاصة من مكان لمكان آخر ( رسالة أرسلتها مني لصديقتي مثلًا ) وهي محمية ومشفرة تمامًا, لايستطيع أي شخص إنه يفهمها إلا اللي بملك المفتاح , فلو كان فيه هكر بالنص وفكر يسرق الداتا رح يشوف كلام غير مقروء وغير مفهوم بالنسبه اله, يعني شكل الداتا بكون غريب لأنه تم تشفيرها قبل ما تنرسل لهيك ما رح يقدر يعرف شكل الداتا الأساسي .
قبل ما أتكلم عن أنواعه ، نشوف هالسيناريو البسيط:
تخيلوا عنا بوابتين ، باب للبيت وباب لغرفة تحتوي خزنة أموال , باب البيت اله مفتاح واحد وهو نفس المفتاح بفتحه وبغلقه يعني خلص اللي معه مفتاح البيت بإمكانه إنه يدخل ويشوف البيت من الداخل كيف ويعرف كل شيء داخله.
والباب الآخر هو باب غرفة الأموال وهالباب من الخارج فيه رمز سرّي لأي شخص بده يدخل الغرفة, يعني لازم يكون عارف هذا الرمز ويكتبه صح حتى يدخل ( إذًا هذا هو مفتاح دخول الغرفة ) بس اللي داخل الغرفة وبده يطلع للخارج بس بيستخدم مفتاح عادي
خاص بمقبض الباب ويفتح فيه الباب ( إذًا هذا هو المفتاح الآخر وهو خاص بالخروج من الغرفة فقط )لاحظنا الفرق بين هالمثالين وهو إنه الأول مفتاح واحد للداخل والخارج بما فيهم الحرامي, يعني لو حصل على هالمفتاح خلص قيم أوفر.
أما الآخر لا اله مفتاحين ؛ الداخل اله مفتاح والخارج اله مفتاح آخر, فبتحتاج مفتاحين واحد حتى تطلع والآخر حتى تدخل.
والآن تعالوا نفهم أنواع الـ Encryption من خلال هالمثال اللي قلته.
أنواع الـ Encryption:
النوع الأول هو الـ Symmetric Encryption:وهو باختصار شديد الفكرة إنه بكون عندي مفتاح واحد secret key خاص بتم فيه التشفير وفك التشفير ، وهذا المفتاح بكون عند الطرفين المُرْسل والمستقبل يعني لو بدك ترسل رسالة لصديقك من خلال الإنترنت بتستخدم طريقة مُعينة ( خوارزمية التشفير ) , ويتم فيها باسخدام هذا المفتاح الخاص تشفير الداتا (البيانات), ولما توصل لصديقك بقوم صديقك باستخدام نفس المفتاح اللي تم فيه التشفير لفك التشفير تمامًا زي مثال الباب الأول, نشوف مثال بسيط عليها :
يمكن اعتبار ceaser cipher من أحد أنواعها ,وهالنوع بحكي إنه بأخذ كل حرف من الرسالة ويستبدله بحرف غير (مثلًا بدي أبدل كل حرف إنجليزي بخامس حرف بيجي بعده) وهكذا كل حرف بمشي خمس حروف بعده وبكتبه مكانه يعني ببدله فيه ، طبعًا هاي الخوارزمية ما الها عدد ثابت أبدل فيه الحرف يعني لا يُشترط خمسة ممكن سته أو سبعه أو أي عدد؛ لذلك أي شخص بتوصله رسالتي وهو ما عنده علم إني استبدلت كل حرف بخامس حرف بعده ما رح يفهم شيء, رح يكون الكلام ملخبط ولا رح يكون عارف إنه استبدلت كل حرف بخامس حرف بعده ، ولو عرف إنه هيك عملت بسهولة بقدر يفك التشفير ، إذًا بالحالة هذه الرقم خمسة بنعتبره مفتاح التشفير ومفتاح فك التشفير.نشوف مثال:
وتأكيد على المعلومة مثل ما شفنا بالمثال, اللي بعرف إنه تم استبداله بمقدار خمسة ، بسهولة بس يوصله النص المشفر ببدل كل حرف باللي قبله بخمس خطوات وبفهم الرسالة الأصلية واللي مابعرف إنه خمسة ولا بفهم كيف يفكه.النص الأصلي " Hi how are you "
مقدار التبديل ( Shift ) اللي هو نفسه المفتاح = 5
النص المشفر " Op ovd hyl fvb "
معلومة مُهمّة بحالة الـ Encryption : النص بعد ما تتم عليه عملية التشفير ( النص المشفر ) بسمّيه —> Cipher Text
من أنواع الـDES ,Triple DES AES , RC5: Symmetric Encryption طيب فرضًا لو فيه هكر بينا (بين الطرف المرسل والطرف المستقبل ) وعرف هالمفتاح هذا ؟ اللي ذكرناه هو إنه نفس المفتاح بشفر فيه وبفك التشفير وبعرفوه الطرفين حتى يقدروا يشفروا ويفكوا التشفير , فلو الهكر قدر يمسك المفتاح إذًا خلص بسهولة بقدر يفك التشفير ويقرأ كل الكلام المكتوب , فمن المشكلة هاي أجينا بنوع تشفير آخر وهو:
النوع الثاني من أنواع الـ Encryption هو الـ Asymmetric Encryption :وهون نفس مثال باب الغرفة اللي فيها الخزنة ، عندي مفتاح خاص (private key) ومفتاح عامّ (public key) ، نتفق على أشياء أساسية وثابتة هون وهي:
- المفتاح الخاص (private key) فقط بستخدمه لفك التشفير .
- المفتاح العام (public key) فقط بستخدمه للتشفير.
مثل الباب للغرفة اللي فيها خزنة (المفتاح من جوا بس بشتغل أما من برا فلازم أكون عارف الرمز ) ؛ يعني اللي معه الـ public key عادي أي شخص بقدر يأخده ويشفر فيه مو شيء خطير ,لكن المشكلة بتكمن بالمفتاح الآخر الخاص بفك التشفير وهو الـ private key
لأنه اللي معاه ياه حرفيّا خلص فقيم أوفر بسهولة بقدر يفك الداتا المشفرة ، فمن هون الهكر ما رح يقدر يوصل للـ private key لأنه بكون فقط موجود عند الطرف المستقبل ( اللي بده يستلم الرسالة ) ومو مع أي حد غيره ، لكن الـ public key بكون مع الطرف المرسل يعني عادي لو أي شخص أخده ما رح يقدر يفك تشفير باستخدامه.الملخص:
- الحاله الأولى: لو صديقتي بدها ترسلي رسالة على الإنترنت بتستخدم الـ public key الخاص فيني حتى تشفر الكلام باستخدامه, والـ private key الخاص فيني فقط بكون موجود معي وممنووع أشاركه مع أي شخص واتفقنا إنه بستخدمه حتى أفك التشفير فيه ، هذا في حال لو هي بدها ترسلي.
- الحالة الثانية: طيب لو بدي أنا أرسلها ، بستخدم المفتاح العام public key الخاص بالمستقبل وهي صديقتي ؛ حتى اقدر أشفر الكلام ، وهي عندها الـ private key الخاص فيها اللي من خلال بتفك أي نص تم تشفيره باستخدام مفتاحها العام فالمفاتيح هاي عبارة عن ثنائي ؛ واحد منهم للتشفير والآخر لفك التشفير .
من أنواع الـRSA , Curve : Asymmetric Encryption أي شخص رح يرسلك شيء بستخدم المفتاح العام الخاص فيك لتشفير الرسالة ، وأنت بتفك تشفيره بالـ private key
وطبعًا لما تعرفوا أنواعهم وكيف بتشتغل الخوارزميات بالضبط رح تفهموا كل شي بشكل أوضح لكن هذا كان مجرد مدخل لعالم التشفير
التعديل الأخير بواسطة المشرف:
