السلام عليكم ورحمة الله وبركاته
كيف الحال ؟
رح نحكي اليوم عن معنى "البرتوكول" بشكل عام، وكيف تُحاكي البرتوكولات المستخدمة بين البشر وكمان رح نذكر بعض البرتوكولات المستخدمة في الحواسيب.
بسم الله نبدأ
...أولًا خلينا نعرف شو معنى كلمة برتوكول ؟
رح أسألكم سؤال
لما تكون بتاخذ محاضرة في الجامعة والدكتور ياخذ حضور وغياب وينادي على اسمك شو بكون ردك ؟
رح تحكيلي إما (نعم ، حاضر ، موجو
تمام, طيب عمرك شفت طالب لما ناداه الدكتور حكى "بدي أروح على البيت" !؟!! رح تحكيلي لاا، شو دخل الدكتور بياخذ حضور شو بده بالمكان يلي بده يروحله الطالب! يعني بنفهم من الكلام إنه هالجواب كسر قواعد معينة لأخذ الحضور أنتَ والدكتور فيما بينكم مشيتوا عليها وهاد الدكتور ينادي على اسمك وأنتَ تجاوب بكلمات تدل على وجودك بالقاعة.
طيب كمان سؤال ممكن تحكي (نعم ، حاضر ، موجود دكتور) بدون ما ينادي عليك الدكتور ؟ رح تحكيلي لأ لأنه هيك كمان بكسر القواعد يلي ماشيين عليها لأنه العملية المفروض تبلش من الدكتور وأنا بعدها أرد مش العكس.
يعني كسرنا للقواعد رح يسبب miscommunications في عملية التواصل بين الطالب والدكتور ولهذا السبب لازم نلتزم فيها , شايفين القواعد يلي لازم تمشو عليها هاي هيه البرتوكول يا صديقي يعني المثال يلي ذكرناه هو برتوكول لأخذ الحضور.
وهيك صرنا جاهزين لحتى نعرّف البرتوكول وهو مجموعة من القواعد والإتفاقيات يضعها طرفي الحديث ويتم التنسيق بينهم على أنه -لما بدنا نحكي بدنا نستخدم القواعد المتفق عليها عبر شبكة معينة للتواصل-.
طيب تعالو نفكر ببرتوكول ثاني ؟ مثلًا رد السلام يلي بحكي السلام عليكم رح تحكي وعليكم السلام أو مثلًا عند ذكر سيدنا محمد (صلَّ الله عليه وسلم) مباشرة رح تصلي على النبي وتحكي ( اللهم صلَّ وسلم وبارك على سيدنا محمد )
طيب نيجي لموضوعنا الأساسي وهو الحاسوب،صح كلنا بنعرف إنه الحاسوب بحاكي الإنسان؟
وإنه الحواسيب تتواصل في ما بينها عبر شبكة أو عدة شبكات ؟ تمام، عملية التواصل بين الأجهزة أكيد لازمها قواعد تنظمها لحتى نتجنب أي miscommunications ممكن يصير خلال العملية , وهون علماء الحاسوب الله يسلمهم وضعولنا مجموعة كبيرة من البروتوكولات يلي بتنظم عملية التواصل في الحواسيب.
ومن أهم البرتوكولات واللي هي مشهورة جدًا :
- HTTP : ينظم عمليات التواصل عند استخدام أو تصفح مواقع ويب.
- SMTP : ينظم عمليات الإرسال في البريد الإلكتروني.
- DNS : رح نحكي شو بيعمل بس بدنا نفهم كم شغلة قبل! ركزو معي،!
كلنا بنعرف انه الحاسوب بفهم بس بنظام الباينري (0,1) يعني لما بدنا نبحث عن أي Domain بدنا إياه وليكن مثلًا (example.com) المفروض كل Domain يكون عبارة عن مجموعة من (0,1) لحتى يفهمه الحاسوب وكمان لازم تكون هالمجموعة unique فقط لهذا الـ Domain حتى تميزه عن باقي Domains وهون ظهر عنا مفهوم IP address ، وهو رقم مكون من 32bit ويكون unique لكل Domain.
بس عدد الـ Domains في العالم كثير كبير ومن المستحيل علينا إنه نحفظ كل ال IP addresses لكل Domains في العالم لحتى نقدر نبحث عنهم في كل مره بنحتاجلهم , طيب والحل ؟
الحل هو إنه كل Domain ياخذ اسم واحنا ما علينا إلا نبحث عن الاسم لأنه سهل, علينا البحث عن ال Domain باسمه بدل من أرقام , مثلًا أسهل إنه أبحث عن ( amazon ) باسمها بدلًا من البحث عن IP address الخاص فيه , وبالنسبه للحاسوب كونه ما بفهم إلا (0,1) هو يقوم بتحويل الاسم إلى IP address
وهون بيجي دور برتوكول DNS بحيث إنه يقوم بتحويل أسماء Domains مثل (shell.com) إلى عنوان IP المقابل له في السيرفرات على الإنترنت عن طريق جدول فيه كل عناوين IP مع الاسم المقابل له يسمى DNS table
ممكن يكون لنفس عنوان IP أسماء عدة بس لنفس Domain بنسميهم alias names , نشوف مثال لنفهم أكثر
لو بدنا نبحث عن جامعة اليرموك في أي متصفح ممكن نكتب( Yu , Yarmouk university , جامعة اليرموك , اليرموك جامعة , ...) كلهم أسماء لنفس Domain معناها كلهم في DNS table بكون الهم عنوان IP واحد - TCP& UDP: يتحكموا في نقل الداتا من وإلى .
- TCP : يضمن التسليم الصحيح للداتا من المرسل للمستقبل ولو صار أي فقدان في الداتا أو جزء منها بعمل إعادة إرسال لحتى توصل بشكل صحيح ولهذا السبب فيعتبر أبطئ من UDP وأكثر تعقيد من ناحية format ويستخدم عادةً في Emails , files transfer , web documents , ...
- UDP : ما بضمن التسليم الصحيح للداتا ولو صار فقدان فيها ما بعمل إعادة إرسال ولكنه أسرع من TCP وأقل تعقيد من ناحية ال format ويستخدم عادةً في الألعاب عبر الإنترنت أو البثوث المباشرة لأنها تحتاج سرعة في نقل الداتا.
وبهيك بنكون كملنا موضوعنا لليوم نراكم في مواضيع أخرى إن كان في العمر بقيّه
والسلام عليكم ورحمة الله وبركاته
والسلام عليكم ورحمة الله وبركاته
التعديل الأخير بواسطة المشرف:
